قبل مده كنت في حفله زفاف احدى صديقاتي , علا صوت اغنيه فهبوا البنات للرقص والتمايل عليها وكل وحده "دخلت جو " مع نفسها , حسيت ان في شي غلط بالموضوع!!! خاصة وان كلمات الاغنيه كانت “غير طبيعيه”
" ادعي علي بالموت والا سمني بس لا تفارقني دخيل الله وتغيب ! "
المشكله ان الساذجات شعرن بان كلمات هذه الاغنيه قمه في الرومنسية !
لا اتخيل نفسي اتوقف عن الحياة لاجل حبيب ما , ليش شمسويلي اهو !! , طبعا انا لا اتكلم عن زوجي او احد افراد اسرتي :x
كافي انه بس يحبني واحبه , لكن اذا فيها موت وما موت الله يعافيه "خل يوخر عني" @@
شهالتخلف اللي حايشنا !
كلمات خرابيط ومالها معنى ولا هدف مشيناها, بس توصل السالفه للدعاوي !! لا ماراح اسكت " مادري شبسوي يعني " لول
وحده اعرفها حاطه البيرسونال مسج بالمسنجر :-
" الموت اهون ولا دنياي من دونه "
خير شتقولين !!
والله لو شنو ماراح ادعي على نفسي بالموت , معقوله مانحس ابقيمتنا في الحياة , معقوله بدوا شبابنا يحسون الحب كل شي بالدنيا ! يعني يا تحبون بعض وتستمرون بالحب , يا خلاص بتنتهي حياتك ! ماعندج رساله غير انج تكونين جزء من حياته ! وتوسعين صدره بجم كلمه حلوه!! طبعا هالكلام مو موجه للبنات المرتبطات فعليا !! بس للي ما بعد ارتبطوا وعلى علاقه متأملين انهم "انشاء الله" يرتبطون !
استغرب من البنت اللي تحاول تنتحر على شان " صاحبها " خانها , وحطوا تحت "صاحبها" خمسة وسبعين خط
و استغرب جدا من البنت اللي ما تنام الليل وتبجي على شان "صاحبها " يشك فيها , وبعد تحت " صاحبها " خمسة سبعين خط . واستغرب من البنات اللي يفقدون صوابهم لما يسالوني ار يو ان لوف ؟ اقول لا ! وتعالو شوفوا الاندهاش , اوه مااااي قااااااد,, نووو وييييييييي ,, انتي مستحيل ما تحبين واحد ولا في احد اب بالج نوووووووووو اي دونت بليف يوووووو !!!!!!!!!!
ماا ادري شرد عليهم ! جني قايلتلهم " ترا متلبسني جني"
مادري شالاسباب , ما راح اقول وازع ديني لان هذي الامور يتحكم فيها العقل, اذا كان وازعج الديني ميح ماكو ياختي فكري بعقلج, معقوله بتموتين نفسج عشان واحد عايش حياته بالطول والعرض, بغض النظر عن طريقة عيشه اللي عايشها سواء كانت صح او خطأ, بس هل سأل فيج متى نمتي والا متى قعدتي!! , انتي مجرد انسانه كانت تشغل شي هو يحتاجه و الحين خلصت صلاحيتج وبكل بساطه استبدلج بوحده يديده ! وليتها وحده , تلاقينهم عشر, كل وحده تعبي فيه جانب , وحده تمدحه وترضي غروره, وحده مثقفه وتعبي جانب الجهل عنده , وحده ستايل وتسعد عيونه, وحده تغنيله و توسع صدره, والى ماله نهايه من هالوحدات !!!!
و كما قالت خالتي حفظها الله من كل مكروه " انا ما اقول لا تحبون , حبوووووا , بس حبوا صــــــــح ! "
الحب مو انج خقيتي على كلامه وخق اهو على ستايلج و خلصنا !
الحب يا حلوه مــعـــامـــلـــــه
الحب انج تفهمينه ويفهمج بحدود المعقول ولا تطولون بمحاولة الفهم وارتبطوا على طول, اكاد ان اجزم بان 75% او اكثر من شبابنا اللي على قولتهم "يحبون" لو تقولوله تزوجها تصكر عيونك وتبطلها تشوفه انه قاطع علاقته فيها !
هذا غير اللي فاهمين الحب غلط, هذوله عالم ثاااني , ناسين انه احنا بعصر انفتاح , طبيعي يتكلم فيه الرجل مع المرأه والعكس , خصوصا بالجامعة او بمكان الشغل , اي شخص تبتسمين له او تردين عليه بذوق وادب حس انج خفيفه وخلاص سيده طلع الرقم وقالج انه بيكلمج الليله, بس لانج خدمتيه واحترمتيه لانه انسان !
ونفس الشي البنات , اي بنت يبتسم لها شخص بس لانها مرت عليه وبحلقت عيونها فيه, خلاص حست انه يحبها على طول
* وحده ياتلي قالتلي فطووومه فلان يحبني
قلت لها صج؟ شلون دريتي؟ قالج اشكره؟؟
قالت لا بس علق على موضوعي بالمنتدى وقال " الله لا يحرمنا منج "
يا الاااااااااااااااااااااااااااهي مااااااا هذااااا التفكير
ابجي , اضحك شسوي !!
شلون لازم تكون ردة فعلي جدام هالغباء المستفحل !!
انا مو قاعده اوعظ هني , ادري مليتوا من محاضرات الذئاب البشريه ,المشكله على كثر ما نسمع محاضرات على كثر ما يزيد الفساد فينا ,
لان الناس بدت تحس ان المحاضرات واجب اسري او مدرسي ..
مثلا تلقون المدرسه كل اسبوعين تسوي ندوه دينيه وكل الي يحضرون هالندوات رغبتهم الاولى والاخيره اهي " قص الكلاسات " ..
و طبعا تقتصر الندوات على الحجاب والحف والمغازل بالنسبه للبنات
والتدخين والمخدرات بالنسبه للشباب
ونص الحاضرات مو محجبات و حافين
ونص الحضور مدخنين و محششين !!
وكل الي تم ذكره بالندوه دخل الاذن اليمنى مُسَلٍماً و خرج من اليسرى مُودعا , لماذا ؟ لانهم حشووووا الدين بروسنا حش من غير اقتناع فوصلنا الي ما وصلنا اليه الحين !
للأسف احنا ماخذين الدين كعقيده (فـــقـــط) ! ونسينا او تناسينا انه اسلوب حياه كامل متكامل , لانه احنا نؤديه كواجب, بدون اقتناع تام , لانه احنا تعودنا على اسلوب التنفير والخوف والنار وياويلكم من النار
دايما نقول يا ويلك من الله , بس ما نقول لو سويت جذي الله سبحانه يحبك !
تناقض في تناقض
بهالايام صار اللي يحب دينه متخلف و رجعي , والمتحرر والمنفتح على الدنيا بمصراعيها صار علماني , ليبرالي , كافر , فاجر . ماكو تفرقه و فهم للمفاهيم السابقة .
و الشي اللي اسمه وسطيه هذا معدوم عندنا
الفئه المتدينه تشوف اي شخص يخالفها ببعض الافعال خارج عن المله ويبدون بتنفيره وتكفيره بطريقتهم الاستفزازيه ! والفئه المتحرره تكره المتدينه وكل ما يبت لها بصله , وتلقونهم احيانا يسوون اي شي بس عشان يقهرون الفئه الاولى !
*يحكي صديق الكتروني لي قصة صديقه, قال " بانهم لما سافروا اكتشف ان صديقه ما يصلي رغم انه كان في الكويت يصلي ويشوفه بالمسجد ! سأله يا فلان شقصتك ؟ ليش صرت ما تصلي فجأه؟! قاله هناك كنت اصلي لاني خايف من الوالد , الحين ما في والد فباخذ راحتي "
الله المستعان , يحسب الصلاة واجب اسري مثل ( قم جيب لي ماي ) !
لان ابوه يقومه بخيزرانه للصلاه , لان ابوه علمه ان الصلاة بس تسلم تكبر تركع وتسجد , من غير لا يشرح له ليش نصلي!
1- جهل في التربية
2- جهل في التعليم
3- جهل في المجتمع
*صارلي موقف مره بالجمعية , كلمت وحده متنقبه طالع شعرها من ورا , قلت لها لو سمحتي اختي شعرج طالع , طالعتني من فوق لي تحت باستحقار وقالت : انتي تغطي بالاول!!!
ابتسمت بوجهها وقلت شكرا :)
ليش! لان مهما تناقشت معاها ما راح ادخل الصح بتفكيرها ولا حتى انش , سطحيه شديده !
هذا غير عن المسخرة الموجودة في الفيس بوك , متلثمه ومطلعه صدرها وظهرها وكل مفاتنها, هي ما همها دينها همها انهم ما يعرفونها !
طيب ياروح قلبي ربي يعرفج !
المشكله صاروا يحسون صدروهم افضل من وييهم واعذروني على الانفتاح بالحجي, لان هذا الواقع !
لا يا عمري حطي صورة ويهج ولا تحطين صورة صدرج او مؤخرتج :x
فاتحتلي بروفايل مسميته باسم مادري شنو نوني الموني وسوسي توتي وراصتلي صور شفايف ورجول وسيقان وفخوذ وصدور وملابس داخلية !
لي وين بنوصل !
وشنو القادم !
تتوقعون بنصحي وننمي عقولنا , والا بنستمر بالانحدار لي اسفل مع السافلين !
اول ما دخلت للجامعه قلت الحين مرحلة النضج , ما راح الاقى بنات راح اتعب في معاشرتهم والانسجام معاهم , بس للاسف اكتشفت ان ايام المتوسط والثانوي تختلف اختلاف كبير عن ايام الجامعه
مجتمع الجامعة مجتمع متخلف الى ابعد الحدود , البنت تنتظر اللحظة اللي تيي فيها الجامعه عشان تفرغ طاقاتها المكبوته , لان اصلا مالها مجال تطلع الا في الجامعه .
تلقونها كل شي تسوي , ( شذوذ , علاقات مع شباب , تلفونات سريه , قلة ادب وسطحية ) ..
ومن تفصخ عبايتها بمجرد دخولها الحرم الجامعي ,ويقعد ابوها الشيبه يننطرها في أمل بأن بنته قاعده تتعلم داخل هذا
الحرم
( طبعا انا مو قاعده اعمم , في بنات خـيـريـيـن و يـفـتـخـر فيهم )
بس القاعده تقول الشر يعم , وللاسف احنا قاعدين نشوف الفساد اكثر من الخير او الخير يتم بسريه وكاننا نسوي شي غلط والفساد يصير علني !
الواحد صار يخاف على نفسه من انهم يسحبونه لي طريجهم , ما عاد في اصحاب نماشيهم !
اقعد مع بنات في الجامعه مواضيعهم رقمني فلان , قزينا عالحب ,هذيج لابسة وهذيج مادري شسوت
خلصت المواضيع!! على الرغم من ان واحده منهم تدرس خدمة اجتماعية هذي مابقالها سنه وبتوفيج من الله راح تتخرج ووظيفتها اهي محاولة اصلاح المجتمع !
بس بنتين ثلاث بنات اللي يشاركوني نفس التفكير و الباقي الله يستر علينا وعليهم !
اذا نصحنا صرنا من المغضوب عليهم , واذا سكتنا تعبت نفسياتنا من الي نشوفه
طبعا انا مو منزهه عن الخطا , وايد ناس تشوفني مذنبه والله يهديني , بس عمري ما قفلت باب النصيحه وقعدت اسب والعن الي تنصحني!
اللي تكلمني باسلوب ابتسم لها واقولها ادعيلي بالهداية
واللي تكلمني بدون اسلوب اضحك لها واقولها شكرا ماقصرتي
اذكر في الثانويه لما يبون يعاقبون اي بنت نتيجة لسلوك خاطيء يقومون بفصلها , يحسبون ان الترهيب والفصل اييب نتيجه ! لا طبعا البنت كل هالفتره قعدت حاقده على كل شخص تسبب بفصلها ورجعت عشان تنتقم !
وهذا اهم يحاولون ينتقمون بطريقتهم الغبيه !
شقول وشخلي من المواقف اللي تواجهنا يوميا
شي يضحك وشي يبجي وشي صج يألم ويخلينا نكره حتى بيوتنا
الله يصلح الحال
تعبت من الحنه
